Gwaith celf Mali a Cadi yn cael ei arddangos yn Llundain
Ar ôl cwblhau eu cyrsiau yng Ngholeg Menai'r haf hwn, mae darnau gan y ddwy wedi'u dewis ar gyfer arddangosfeydd anrhydeddus
Mae gwaith Mali Smith a Cadi Richardson wedi cael ei ddewis i'w arddangos yn Llundain ychydig ar ôl iddyn nhw gwblhau eu cyrsiau Celf a Dylunio yng Ngholeg Menai.
Mae darn 3D trawiadol Mali a wnaed o fetel, ‘Warming Waters’, wedi’i ddewis ar gyfer arddangosfa fawreddog UAL, Origins Creative, yn Orielau'r Mall ar y 16-19 Gorffennaf.
Mae ‘Warming Waters’ yn tynnu sylw at effeithiau newid hinsawdd ar fywyd o dan y môr, a llwyddodd i ddenu sylw curadur UAL, Calum Hall, o blith mwy na 600 o ddarnau o bob cwr o’r Deyrnas Unedig.
Bydd yn cael ei arddangos tan ddydd Sadwrn yn Origins Creative, arddangosfa flynyddol a gynhelir gan UAL, y corff dyfarnu ar gyfer y cwrs Celf a Dylunio Lefel 3 a gwblhaodd Mali yn ddiweddar ar gampws Parc Menai.
Mae Origins Creatives yn arddangosfa rad ac am ddim, sy'n rhoi llwyfan i weld a dathlu talent newydd, gan eu cysylltu â chydweithwyr posibl, arweinwyr y diwydiant a chynulleidfa ehangach.
Mae'n cynnwys gwaith myfyrwyr o lefel mynediad hyd at Lefel 4 ar draws amrywiaeth o feysydd creadigol - gan gynnwys ystod eang o waith peintio, ffotograffiaeth, lluniadu, cerflunio, ffasiwn a mwy.
Mewn man arall yn Llundain, bydd cylchgrawn a grëwyd gan Cadi fel rhan o'i chwrs Sylfaen Celf yng Ngholeg Menai yn cael ei arddangos yn Amgueddfa Ddylunio Kensington.
Bydd ei chylchgrawn, ‘Ynys Môn Camping Trip Guide’, a greodd fel rhan o brosiect mapio, yn cael ei ddangos o fis Medi ymlaen fel rhan o arddangosfa Future Observatory, sy’n para blwyddyn, ac sy’n hyrwyddo dylunio â meddylfryd newydd ar faterion amgylcheddol.
Yn ddiweddar, cynhaliodd yr Amgueddfa Ddylunio arddangosfa yn cynnwys gweithiau celf o yrfa'r gwneuthurwr ffilmiau chwedlonol Tim Burton. Mae'r sioeau sydd ar y gweill yn amrywio o arddangosfa ar glwb nos eiconig y 'Blitz' yn Llundain, i edrych yn ôl ar yrfa'r cyfarwyddwr ffilm Wes Anderson.
Hoffech chi weithio yn y sector Celf a Dylunio? Mae Grŵp Llandrillo Menai yn cynnig amrywiaeth o gyrsiau o Lefel 1 hyd at lefel Gradd. Dysgwch ragor yma