David yn cipio gwobr Seren y Dyfodol - Criced Cymru

Enillodd David Owen, myfyriwr yng Ngholeg Menai, wobr Seren y Dyfodol Criced Cymru am waith hyfforddi yng Nghlwb Criced Porthaethwy.

⁠Cyflwynwyd y wobr i David, 16 oed, yn y noson "Gwobrau Gwirfoddolwyr Criced Cymru 2023", a gynhaliwyd yn ddiweddar yng Nghaerdydd. Mae ei enw wedi cael ei gyflwyno gan Criced Cymru i'r un categori yn noson wobrwyo Bwrdd Criced Cymru a Lloegr.

Mae David, sy'n dilyn cwrs Lefel 3 mewn Hyfforddi ym maes Chwaraeon ar gampws Coleg Menai yn Llangefni, yn hyfforddi chwaraewyr ym mhob grŵp oedran yn ei glwb lleol, o'r tîm Dan 9 i'r rhai Dan 15.

Bu'n gapten ar drydydd tîm Porthaethwy nifer o weithiau dros yr haf, tîm sy'n llywio chwaraewyr o'r tîm dan 15 oed i dîm y dynion, ac sydd wedi cipio'r safle uchaf yng Nghynghrair Criced Gogledd Cymru - Adran Dydd Sul y Gorllewin.

Yn ogystal â hyn mae David yn chwarae mewn sawl safle gwahanol i'r tîm cyntaf a'r ail dîm ac yn hyfforddi tîm y merched.

Cyflwynwyd y wobr 'Seren y Dyfodol' gan Rachel Warrenger, Swyddog Datblygu Criced Merched gogledd Cymru, mewn seremoni a gynhaliwyd yn ystod gêm ddiweddar rhwng Morgannwg a Derbyshire.

Meddai David: Roedd hi'n brofiad gwych. Roedd gen i bobl yr un oed â mi yn fy helpu i pan oeddwn i'n chwarae i'r timau dan 13 ac 15, felly roeddwn i eisiau gwneud rhywbeth tebyg iddyn nhw, a rhoi rhywbeth yn ôl."

Dywedodd Sue Wells, rheolwr ardal Gogledd Cymru: "Mae David yn wirfoddolwr arbennig iawn yng Nghlwb Criced Porthaethwy ac mae wedi gwirfoddoli i redeg rhaglenni criced i bobl ifanc ers tair blynedd erbyn hyn.

Mae'n aelod ymroddedig o'r clwb criced sydd yn barod bob amser i helpu gyda'r timau iau. Yn ogystal â hyfforddi mae'n dyfarnu, ac yn cadw sgôr mewn gemau, i'r adran iau a'r adran hŷn. Mae'r wobr Seren y Dyfodol yn gwbl haeddiannol."

⁠Gobaith David, wedi iddo gwblhau ei gwrs yng ngholeg Menai ydy treulio tymor yn chwarae criced yn Awstralia. Mae hefyd yn chwaraewr rygbi dawnus ac yn cynrychioli tîm ieuenctid Bangor.

I gael rhagor o wybodaeth am gyrsiau Chwaraeon ac Addysg Awyr Agored yng Ngholeg Menai, cliciwch yma. Mae ceisiadau yn agor ym mis Tachwedd ar gyfer mynediad ym mis Medi 2024.