Coleg Llandrillo, Coleg Menai, Coleg Meirion-Dwyfor and Busnes@LlandrilloMenai logosColeg Llandrillo, Coleg Menai, Coleg Meirion-Dwyfor and Busnes@LlandrilloMenai logos

Arddangos cylchgrawn Ynys Môn Cadi mewn arddangosfa fawreddog yn Llundain

Creodd Cadi'r gwaith wrth astudio cwrs Sylfaen Celf yng Ngholeg Menai yn gynharach eleni

Bydd gwaith celf gan gyn fyfyrwraig o Goleg Menai, Cadi Richardson, yn cael ei arddangos mewn arddangosfa yn Llundain am y 12 mis nesaf.

Dewiswyd ei chylchgrawn, 'Ynys Môn Camping Trip Guide', ar gyfer arddangosfa 'Future Observatory' a fydd yn para blwyddyn yn Amgueddfa Ddylunio Kensington.

Creodd Cadi, o Gonwy, y gwaith yn gynharach eleni fel rhan o'i chwrs Sylfaen Celf ar gampws Parc Menai.

Ers hynny mae hi wedi cwblhau'r cwrs yn llwyddiannus, a bellach yn paratoi i symud i Lundain i astudio cwrs Dylunio Tecstilau ym mhrifysgol celf fyd-enwog, Central Saint Martins.

Synnwyd Cadi i gael ei dewis ar gyfer yr arddangosfa, ar ôl iddi ddechrau gweithio ar ei chylchgrawn fel ymarfer hwyliog yn ystod gweithdy mapio.

Meddai: “Fe wnes i feddwl am hafau fy mhlentyndod a dreuliais yn gwersylla yn Ynys Môn gyda fy nheulu. A dweud y gwir, fe ddechreuais trwy chwarae o gwmpas yn gwneud rhestrau gyda fy ffrindiau am bethau gwahanol neu ryfedd i fynd gyda chi neu eu gwneud ar drip gwersylla. Roedd yn hwyl a wnes i ddim ei gymryd o ddifri.

“Roeddwn i wedi'n synnu o glywed bod fy ngwaith wedi cael ei ddewis. Efallai mai'r ffaith nad oeddwn i'n meddwl yn rhy galed am y canlyniad terfynol, neu mai dyma'r gwaith gorau i mi ei wneud. Cynhaliwyd y gweithdy tra roeddwn i'n paratoi fy mhortffolio ar gyfer y brifysgol ac roeddwn dan straen a bron i mi ofyn i gael ei fethu. Rydw i’n falch na wnes i.”

Dywed Cadi fod y cwrs Sylfaen Celf blwyddyn o hyd wedi ei pharatoi’n dda ar gyfer y brifysgol wrth iddi edrych ymlaen at yrfa greadigol yn gweithio gyda thecstilau traddodiadol.

“Rydw i wedi elwa cymaint o’r cwrs Sylfaen Celf,” meddai hi. “Rydw i wedi magu hyder a mwy o angerdd yn yr hyn roeddwn i’n ei wneud, ac wedi gwneud ffrindiau bore oes. Roedd y gweithdy creu cylchgrawn yn sicr yn uchafbwynt i mi oherwydd yr holl hwyl a gawson ni yn ystod y ddau ddiwrnod hynny.

“Rydw i'n edrych ymlaen at symud i Lundain ym mis Medi i astudio Dylunio Tecstilau yn Central Saint Martins. Rydw i am barhau i greu celf gyda thecstilau gan gyfuno technegau traddodiadol â'r gwaith rwy'n ei greu nawr. Er enghraifft, fe wnes i drwsio hen olwyn nyddu yn ddiweddar ac rydw i wedi bod yn nyddu fy edaf fy hun allan o wlân defaid i weithio ag ef. Rydw i'n gobeithio parhau i wneud hynny fel gyrfa.”

Mae arddangosfa 'Future Observatory: Tools for Transition', sy’n hyrwyddo syniadau dylunio newydd ar faterion amgylcheddol, yn agor yn yr Amgueddfa Ddylunio ar 12 Medi. Yn ddiweddar, cynhaliodd yr amgueddfa arddangosfa o weithiau celf y cynhyrchydd ffilmiau chwedlonol, Tim Burton, ac mae'r sioeau sydd ar y gweill yn amrywio o arddangosfa ar glwb nos eiconig 'Blitz' yn Llundain, i edrych yn ôl ar yrfa'r cyfarwyddwr ffilm Wes Anderson.

Mae'r cwrs Sylfaen Celf wedi ei gynllunio'n benodol i baratoi myfyrwyr ar gyfer dilyn cwrs Addysg Uwch a gweithio ym maes Celf a Dylunio. Dysgwch ragor yma, neu ewch i gllm.ac.uk/cy/courses/art-and-design-and-photography i weld yr ystod o gyrsiau a gynigir gan Grŵp Llandrillo Menai.

Pagination

Cysylltu â ni

Nid ydym ar-lein ar hyn o bryd. Gadewch neges ac mi gysylltwn â chi.

Request date