Myfyrwyr Coleg Menai i agor Gwobrau Dawns Cymru 2025
Dysgwyr yn cael eu gwahodd i berfformio eu sioe ddiweddar, Sweet Charity, yn y gystadleuaeth ddawns boblogaidd ym Mhontio
Mae myfyrwyr Celfyddydau Perfformio talentog Coleg Menai wedi derbyn gwahoddiad i agor yr adran theatr gerdd newydd yng Ngwobrau Dawns Cymru 2025.
Nod y digwyddiad, yng Nghanolfan Gelfyddydau Pontio ym Mangor ar 9 Tachwedd, yw dathlu talent dawns o bob cwr o Gymru a thu hwnt mewn amgylchedd croesawgar, sy'n canolbwyntio ar y gymuned.
Wedi'i drefnu gan Byd Bach Events, mae Gwobrau Dawns Cymru yn cynnwys cystadlaethau mewn ystod eang o arddulliau, gan gynnwys categorïau stryd, hip hop, disgo, bale, cerddorol, cyfoes ac agored.
Bydd myfyrwyr o Goleg Menai yn rhoi perfformiad o Sweet Charity, eu sioe diwedd blwyddyn y tymor diwethaf. Hefyd ymhlith yr uchafbwyntiau bydd adran unigol lawn dop, a oedd wedi'i drefnu'n llawn wythnosau cyn y digwyddiad.
Roedd felly yn ddewis naturiol gwahodd myfyrwyr o Goleg Menai i agor y sioe, meddai’r trefnydd Ceri Bostock, cyn-fyfyriwr Celfyddydau Perfformio o'r coleg.
Tynnodd sylw at y cysylltiad agos drwy Chloe Ellis, ei Chyd-Brif Swyddog Gweithredol yn Byd Bach Events, y mae ei merch yn astudio Theatr Gerdd ar gampws Bangor ar hyn o bryd.
“Roedd yn teimlo’n bwysig iawn cynnwys y coleg yn y digwyddiad hwn,” meddai Ceri. “Fel cyn-fyfyriwr, a gan fod merch Chloe ar y cwrs Theatr Gerdd ar hyn o bryd, mae cysylltiad personol - ond yn fwy na hynny, fel cwmni budd cymunedol, rydym wedi ymrwymo i roi rhywbeth yn ôl yn lleol. Mae'r cwrs yn cynhyrchu talent wych, ac mae hwn yn gyfle i'w arddangos ar lwyfan mawr.”
Yn aml, cynhelir cystadlaethau dawns ymhell o ogledd Cymru gyda chostau teithio mawr a lle mae angen aros dros nos, sy'n eu gwneud yn llai hygyrch i lawer o deuluoedd. Cafodd Gwobrau Dawns Cymru eu creu i fynd i'r afael â hynny, gan gynnig profiad cystadlu cyfeillgar o ansawdd uchel yma.
Mae pob cyfranogwr yn derbyn medal, gan bwysleisio ymrwymiad y digwyddiad i ddathlu cyflawniad ar bob lefel.
Lluniau: Ffotograffiaeth Mel Parry
Ychwanegodd Ceri: “Roeddem eisiau creu platfform cefnogol a chyffrous i ddawnswyr ifanc yn nes at adref. Pontio yw'r lleoliad perffaith - ac roedd yn gwneud synnwyr i gynnwys Coleg Menai, sydd ar ein stepen drws ac yn datblygu perfformwyr y dyfodol.”
Mae Gwobrau Dawns Cymru yn parhau i dyfu o ran cwmpas ac enw da, gan ddenu ceisiadau o ysgolion, colegau a grwpiau dawns o bob cwr o ogledd Cymru a chyn belled â Lerpwl.
Mae cystadleuaeth arall eisoes wedi'i chadarnhau ar gyfer mis Ebrill 2026, a fydd hefyd yn cael ei chynnal yn Pontio. Mae'r trefnwyr yn gobeithio y bydd y gystadleuaeth yn parhau i ehangu ac yn tynnu sylw at Fangor fel cyrchfan ar gyfer y celfyddydau perfformio.
Dywedodd Ceri: “Roedd yr ymateb i Wobrau Dawns Cymru'r llynedd yn rhyfeddol, ac rydym wrth ein bodd yn ei weld yn tyfu mor gyflym. Eleni, byddwn yn rhoi hyd yn oed mwy o gyfleoedd i ddawnswyr arddangos eu creadigrwydd, ac rydym wedi cyffroi i groesawu talent o bob cwr o ogledd Cymru a thu hwnt.”
Wyt ti eisiau gweithio yn y diwydiant Celfyddydau Perfformio? Mae Grŵp Llandrillo Menai yn cynnig cyrsiau o Lefel 1 hyd at Lefel 4 (Tystysgrif Addysg Uwch). Dysgwch ragor yma.