Dr Bryn Hughes Parry yn ymddeol ar ôl 30 mlynedd gyda Grŵp Llandrillo Menai

Mae Bryn wedi gwasanaethu fel pennaeth cynorthwyol Coleg Meirion-Dwyfor a Choleg Menai ers 2018, ar ôl dechrau ei yrfa fel darlithydd ffiseg ac electroneg Lefel A ar gampws Pwllheli nôl yn 1993.

Bu hefyd yn dysgu cemeg yn y Coleg, yn ogystal â mwynhau cyfnod fel Cyfarwyddwr Dwyieithrwydd a Marchnata.

Yn gefnogwr rygbi brwd, mae Bryn yn Ffrainc ar hyn o bryd yn gwylio Cymru ym mhencampwriaeth Cwpan Rygbi'r Byd. Bu'n hyfforddi tîm rygbi Coleg Meirion-Dwyfor yn y 1990au, ac yn chwarae i'w glwb lleol, Pwllheli.

Meddai Bryn, sy'n hanu o Llannor ym Mhen Llŷn: “Mae gen i atgofion gwych o’m cyfnod gyda Grŵp Llandrillo Menai. Mae wedi bod bleser gweithio gyda’r holl ddysgwyr a staff rydw i wedi dod i’w hadnabod dros y 30 mlynedd diwethaf gyda Choleg Meirion-Dwyfor a Choleg Menai.”

Dywedodd Aled Jones-Griffith, Pennaeth Coleg Meirion-Dwyfor a Choleg Menai: "Mae’n bleser cael y cyfle i ddiolch yn bersonol i Bryn am ei wasanaeth a’i ymroddiad i ni yng Ngrŵp Llandrillo Menai.

"Dechreuodd Bryn ar ei yrfa fel darlithydd a hynny yn nyddiau cynnar sefydlu Coleg Meirion-Dwyfor 30 mlynedd yn ôl. Maes o law daeth yn bennaeth cynorthwyol ac yn aelod cydwybodol, gweithgar a phwysig o Uwch Dîm Rheoli Coleg Menai a Choleg Meirion-Dwyfor.

"Mae ei gyfraniad cyson a'i eiriau pwyllog a doeth yn rhinweddau y byddwn fel Tîm yn gweld eu colli. Rydyn ni i gyd yn dymuno ymddeoliad hapus iawn i ti Bryn.''

Mae Eifion Owen, Rheolwr Maes Rhaglen y Diwydiannau Gwasanaethu Coleg Meirion-Dwyfor, yn ffrind a chydweithiwr hir oes i Bryn, ac yn ei adnabod ers eu dyddiau yn Ysgol Glan y Môr ym Mhwllheli.

Meddai Eifion: “Bydd ei gyd-weithwyr a myfyrwyr ffiseg fel ei gilydd yn gweld eisiau ei arddull foneddigaidd a chyfeillgar o reoli a dysgu, wedi iddo ysbrydoli cenhedlaeth o wyddonwyr yn ardal Llŷn.

“Mae bellach wedi symud ymlaen ar drywydd anturiaethau newydd, a gall dreulio mwy o'i amser yn dilyn ei arbenigedd mewn ffiseg, sef ei brif ddiddordeb ystod ei 30 mlynedd yn y Coleg.

“Rydyn ni'n gobeithio ei fod yn mwynhau gwylio Cymru yng Nghwpan y Byd. Mi fydd bellach yn gallu gwylio a mwynhau ochr gymdeithasol cefnogi Clwb Rygbi Pwllheli mewn gemau canol wythnos hefyd."