Noson wobrwyo Coleg Menai yn cydnabod dysgwyr rhagorol
Cynhaliodd y coleg Seremoni Gwobrwyo Cyflawnwyr 2024/25 ar ei gampws ym Mangor i ddathlu llwyddiant y myfyrwyr hynny sydd wedi dangos rhagoriaeth yn ystod y flwyddyn
Dathlodd Coleg Menai lwyddiant myfyrwyr rhagorol 2024/25 yn ei Seremoni Flynyddol i Wobrwyo Cyflawnwyr.
Yn y seremoni ar gampws Bangor cyhoeddwyd mai Connie Whitfield oedd 'Cyflawnwr Cyffredinol y Flwyddyn', tra cafodd 15 o'i chyd-fyfyrwyr hefyd wobr am ragori yn eu meysydd rhaglen (mae rhestr lawn o'r enillwyr i'w gweld isod).
Mwynhaodd yr enillwyr araith gan Carmen Smith – cyn-fyfyriwr o Goleg Menai ac aelod ieuengaf erioed Tŷ'r Arglwyddi – wrth iddynt ddathlu eu llwyddiant gyda theulu a ffrindiau.
Bob blwyddyn, gwahoddir darlithwyr o bob maes pwnc i enwebu myfyrwyr am wobr, a rheolwr y maes rhaglen sydd wedyn yn dewis yr enillydd ar gyfer y ddisgyblaeth honno.
Yn y seremoni cyflwynir tlws i bob enillydd, cyn cyhoeddi enw Cyflawnwr Cyffredinol y Flwyddyn – a ddewisir gan y Pennaeth – ar ddiwedd y noson.
Yn y seremoni nos Iau cyflwynodd Pennaeth Coleg Menai, Dr Siôn Peters-Flynn, wobr Cyflawnwr y Flwyddyn a thaleb gwerth £200 i Connie sy'n fyfyriwr yn yr adran beirianneg.
Disgrifiodd Dr Peters-Flynn Connie fel “myfyriwr sydd wedi dangos ymroddiad, aeddfedrwydd ac arweinyddiaeth eithriadol”, gan dynnu sylw at y cystadlaethau sgiliau cenedlaethol y cymerodd ran ynddynt a'i gwaith gyda phrosiect ynni llanw Morlais – lle'r oedd “yn rhan allweddol o lwyddiant y tîm”.
Yn ogystal, derbyniodd Connie wobr Cyflawnwr y Flwyddyn ei maes rhaglen, yn ogystal â gwobr rhwydwaith leol y Sefydliad Peirianneg a Thechnoleg (IET).
Ymysg enillwyr eraill y meysydd rhaglen roedd Casi Evans, sydd wedi chwarae pêl-droed i dîm dan 19 Cymru (Chwaraeon a Gwasanaethau Cyhoeddus) a Lee Morris (Mynediad i Addysg Uwch).
Mae Casi ar ei ffordd i ennill graddau rhagorol ar ei chwrs Lefel 3 mewn Gwyddor Chwaraeon ac Ymarfer Corff, a hi sgoriodd farciau uchaf ei grŵp eleni am ffisioleg – gan gyflawni'r cyfan tra hefyd yn hyfforddi gyda thîm Blackburn Rovers ac yn chwarae ar fenthyg i Halifax. Mae hi hefyd wedi cael ei dewis i fod yn rhan o sgwad Ynys Môn ar gyfer Gemau'r Ynysoedd yn Orkney fis nesaf (12-18 Gorffennaf).
Enwebwyd Lee gan ei gyd-fyfyrwyr yn ogystal â'i diwtor i ddiolch iddo am ei gefnogaeth i eraill, ac am gyrraedd y brig yn academaidd. Llwyddodd i ennill 45 credyd ar lefel rhagoriaeth, ac roedd bob amser yn fwy na pharod i helpu eraill i gyflawni eu potensial.
Yn y seremoni, cyflwynodd Dr Peters-Flynn gapiau i'r myfyrwyr oedd wedi cynrychioli Cymru mewn chwaraeon yn ystod y flwyddyn academaidd. Y myfyrwyr oedd: Byron Davis, Morgan Davies, Casi Evans (pêl-droed), Saran Griffiths (rygbi), Ffion Humphreys (nofio) a Noa Vaughan (traws gwlad).
Cyflwynwyd gwobrau hefyd er cof am y cyn-fyfyrwyr o Goleg Menai, Chloe Bidwell a Rhun Jones.
Wrth agor y seremoni, dywedodd Dr Peters-Flynn: “Fi sy'n cael y fraint o gyflwyno'r gwobrau nodedig hyn i'r myfyrwyr sy'n cael eu cydnabod am eu gwaith caled a'u hymroddiad dros y deuddeg mis diwethaf.
“Mae'r enillwyr heno 'ma wedi cael eu henwebu am eu bod yn fyfyrwyr sydd wedi bod yn barod i fynd yr ail filltir, wedi goresgyn rhwystrau neu wedi rhagori yn eu pynciau. Dyna sy'n gwneud y gwobrau hyn yn rhai arbennig iawn ac mae hi'n fraint cael eu cyflwyno.”
Y siaradwr gwadd oedd Carmen Smith, a ddilynodd y cwrs Lefel 3 mewn Astudiaethau Busnes yng Ngholeg Menai rhwng 2013 a 2015. Ers y llynedd, hi yw'r aelod ieuengaf erioed i eistedd yn Nhŷ'r Arglwyddi, dan deitl ‘Y Farwnes Smith o Lanfaes’, ar ôl y pentref ym Môn lle magwyd hi.
Dyma restr lawn o enillwyr Gwobrau Cyflawnwyr Coleg Menai 2024/25:
Cyflawnwr Cyffredinol y Flwyddyn / y wobr Beirianneg / gwobr rhwydwaith leol IET Connie Whitfield
Gwobr Goffa Rhun Jones (Peirianneg Cerbydau Modur): Mackenzie Diggons
Gwobr 'Anelu at y Sêr' Chloe Bidwell (Adeiladu): Tiago Coelho
Mynediad i Addysg Uwch: Lee Morris
Lefel A (Gwyddoniaeth): Lois Jones
Celf a Dylunio: Mali Smith
ESOL: Kateryna Romaniuk
Celfyddydau Mynegiannol: Jessica Jones
Gwallt a Harddwch: Alicja Basha
Iechyd a Gofal gyda Gofal Plant: Corwen Olsen
Lletygarwch ac Arlwyo: Sam Lee
Dysgu Gydol Oes: Siôn Wyn Jones
Cyfryngau, Datblygu Gemau a TG: Siôn Tegwyn Jones
Sgiliau Bywyd a Gwaith: Jake Fenney
Chwaraeon a Gwasanaethau Cyhoeddus: Casi Evans
Myfyriwr Cymraeg y Flwyddyn: Erin Williams
Grŵp Llandrillo Menai sy'n cynnig y dewis ehangaf o gyrsiau addysgol a chyrsiau hyfforddi yng ngogledd Cymru, o gyrsiau galwedigaethol a phrentisiaethau i gyrsiau Lefel A, graddau a chymwysterau proffesiynol.