Myfyrwyr yn cario fflam Tîm Cymru i ysbrydoli pencampwyr sgiliau'r dyfodol

Croesawodd Grŵp Llandrillo Menai fflam Tîm Cymru i'w gampysau ym Mangor, Llangefni a'r Rhyl yr wythnos hon cyn rowndiau terfynol cenedlaethol WorldSkills UK y mis nesaf.

Roedd y dysgwyr Yuliia Batrak ac Evan Klimaszewski ymhlith cludwyr y fflam wrth i daith gyfnewid 'Taith i Ragoriaeth' wneud ei ffordd ar draws Cymru.

Mae’r ras gyfnewid yn cynyddu'r cyffro wrth baratoi ar gyfer rowndiau terfynol WorldSkills, a gynhelir yng Nghymru am y tro cyntaf o 26-28 o Dachwedd. ⁠ ⁠Mae'r fflam hefyd yn taflu goleuni ar WorldSkills Shanghai 2026, sef cystadleuaeth sgiliau fwya'r byd - a elwir yn fyd-eang yn 'Gemau Olympaidd y Sgiliau'.

Mae Yuliia, myfyrwraig o Goleg Llandrillo, ac Evan, dysgwr o Goleg Menai, ill dau yn y ras i gystadlu yn Shanghai yn eu disgyblaethau priodol, ac mae'r ddau yn gyn-enillwyr rowndiau terfynol cenedlaethol WorldSkills.

Roedden nhw ymhlith y rhai a ddewiswyd i gario'r fflam i ysbrydoli 14 o ddysgwyr y Grŵp sy'n cystadlu yn rowndiau terfynol cenedlaethol WorldSkills a SkillBuild eleni (rhestr lawn isod), yn ogystal â chystadleuwyr posibl yn y dyfodol.⁠ ⁠

Yuliia oedd yn cario'r fflam wrth iddi gymryd lle canolog yng Ngholeg Llandrillo yn y Rhyl ddydd Mercher.

Rhoddodd y ferch 19 oed o Fae Colwyn gyflwyniad ysbrydoledig cyn trosglwyddo'r fflam i'r myfyrwyr peirianneg, Zack Arnold a McKenzie Goodwin-Cotterill, sy'n cystadlu yn rowndiau terfynol 2025.

Enillodd Yuliia, sy'n wreiddiol o Kyiv, y wobr aur mewn Gwasanaethau Bwyty yn rowndiau terfynol WorldSkills UK 2023, ac mae'n astudio Goruchwylio Gwasanaeth Bwyd a Diod Lefel 3 ar gampws y coleg yn Llandrillo-yn-Rhos.

Dywedodd: “Dw i'n teimlo mor freintiedig i fod yn cario’r fflam, ac i ysbrydoli myfyrwyr eraill i gymryd rhan yn y gystadleuaeth hon. Mae'r profiad a ges i ohono yn amhrisiadwy, a byddwn yn bendant yn argymell i bawb gymryd rhan os cewch gyfle. Fyddwch chi ddim yn difaru."

Gwyliodd tua 60 o blant ysgol lleol orymdaith y fflam. Roeddent yn ymweld â champws y Rhyl ar gyfer Her Sgiliau Peirianneg a gynhaliwyd gan Grŵp Llandrillo Menai, Prifysgol Bangor a Gyrfaoedd Cymru.

Ddydd Iau, teithiodd y fflam o amgylch campws Llangefni, lle cafodd ei chario gan gystadleuwyr ym meysydd peirianneg, adeiladu, iechyd a gofal cymdeithasol, chwaraeon, a Sgiliau ar gyfer Bywyd a Gwaith.

Roedd y fyfyrwraig peirianneg awyrennau, Connie Whitfield, yn un o gludwyr y fflam yn Llangefni.

Dywedodd: “Mae wedi bod yn anrhydedd cario’r fflam ac ysbrydoli myfyrwyr eraill. Mae'r cystadlaethau sgiliau yn ymwneud â gwneud ffrindiau a rhannu profiadau yn ogystal â chystadlu. Mae fy mhrofiadau i yn y cystadlaethau hyd yn hyn wedi bod yn anhygoel, ac mi fydda' i'n cael y cyfle hwnnw eto wrth i mi brofi'r Rowndiau Terfynol Cenedlaethol.”

Pan ofynnwyd iddi am ei chyngor i unrhyw un sy'n ystyried cystadlu yn y cystadlaethau sgiliau, dywedodd Connie: “Peidiwch ag oedi pan ddaw'r cynnig i gystadlu, oherwydd mae'n brofiad arbennig ac yn un bythgofiadwy.”

Ar ôl ymweld â Llangefni, aeth y fflam yn ei blaen i Fangor i ysbrydoli'r rhai ar gampws Llwyn Brain Busnes@LlandrilloMenai a gyrhaeddodd rownd derfynol Cyfrifeg, cyn cyrraedd y dysgwyr gyrhaeddodd rownd derfynol y Cyfryngau Digidol yn adran cyfryngau creadigol Coleg Menai.

Dywedodd Aled Jones-Griffith, Prif Weithredwr Grŵp Llandrillo Menai: “Mae cael ras gyfnewid fflam Tîm Cymru ar ein campysau ym Mangor, Llangefni a’r Rhyl wedi bod yn destun balchder mawr. Mae hwn wedi bod yn gyfle gwych i ddathlu cyflawniadau ein dysgwyr ac i ysbrydoli'r genhedlaeth nesaf o bobl ifanc dalentog a gweithgar.

“Mae hefyd wedi bod yn gyfle i arddangos y sgiliau y bydd ein dysgwyr yn cystadlu ynddynt yn rowndiau terfynol y Deyrnas Unedig y mis nesaf - sgiliau maen nhw wedi'u datblygu gyda chymorth ein staff ymroddedig a'r cyfleusterau gwych yng Ngrŵp Llandrillo Menai.

“Dymunwn y gorau i’n holl gystadleuwyr pan fydd Cymru’n cynnal rowndiau terfynol WorldSkills UK am y tro cyntaf y mis nesaf.”

Bydd cannoedd o bobl ifanc yn cystadlu mewn mwy na 45 o gystadlaethau sgiliau ar draws lleoliadau yng Nghasnewydd, Caerdydd, Pen-y-bont ar Ogwr ac Abertawe o Dachwedd 26-28 yn y rowndiau terfynol.

Ledled Cymru, mae colegau wedi ymuno â'i gilydd i ddathlu'r ymdrech y tu ôl i lwyddiant Tîm Cymru mewn cystadlaethau sgiliau galwedigaethol. Mae'r cystadlaethau hyn yn dechrau'n lleol gyda Chystadleuaeth Sgiliau Cymru, a gydlynir gan y prosiect Ysbrydoli Rhagoriaeth Sgiliau yng Nghymru, cyn symud ymlaen i lefel genedlaethol a rhyngwladol trwy WorldSkills UK.

Dysgwyr Grŵp Llandrillo Menai yn cystadlu yn rowndiau terfynol cenedlaethol WorldSkills UK 2025:

• Tomos Jones (Technegydd Cyfrifyddu⁠, Busnes@LlandrilloMenai)
• Lowri Hughes (Technegydd Cyfrifyddu⁠, Busnes@LlandrilloMenai)
• Connie Whitfield (Gweithgynhyrchu Haen-ar-Haen, Coleg Menai)
• Oliver Weldon (Gweithgynhyrchu Haen-ar-Haen, Coleg Menai)
• Guy Geurtjens (Cynhyrchu Cyfryngau Digidol, Coleg Menai)
• Cai Owen (Cynhyrchu Cyfryngau Digidol, Coleg Menai)
• Aron Hughes (Cynhyrchu Cyfryngau Digidol, Coleg Menai)
• Matthew Owen (Cynhyrchu Cyfryngau Digidol, Coleg Menai)
• Iwan Nicklin (Electroneg Ddiwydiannol, Coleg Menai)
• Kayleigh Blears (Trin Gwallt, Coleg Llandrillo)
• Zack Arnold (Ynni Adnewyddadwy, Coleg Llandrillo)
• Mckenzie Goodwin-Cotterill -(Ynni Adnewyddadwy, Coleg Llandrillo)

Dysgwyr Grŵp Llandrillo Menai yn cystadlu yn rowndiau terfynol cenedlaethol SkillBuild 2025:

• Luke Quarless (Plastro, Coleg Menai)
• Ryan Jones (Plastro, Coleg Menai)

I gychwyn eich cystadleuaeth sgiliau yng Nghymru ac am ragor o wybodaeth am sut allwch chi gymryd rhan fel cystadleuydd, cyflogwr, neu hyrwyddwr sgiliau, ewch i: https://inspiringskills.gov.wales/