Grŵp Llandrillo Menai yn barod i bweru dyfodol niwclear Gogledd Cymru drwy arwain darpariaeth sgiliau a hyfforddiant o'r radd flaenaf
Mae Grŵp Llandrillo Menai wedi addo ei gefnogaeth i ddatblygu'r gweithlu medrus sydd ei angen ar gyfer adweithyddion niwclear modiwlaidd bach arfaethedig ar gyfer Rolls-Royce yn Wylfa ar Ynys Môn, gan sicrhau bod Gogledd Cymru yn barod i ddiwallu gofynion y prosiect trawsnewidiol hwn.
Mae’r cyhoeddiad, a wnaed gan y Prif Weinidog ar gampws Llangefni Coleg Menai heddiw (13eg Tachwedd), yn cadarnhau safle Gogledd Cymru fel pwerdy cenedlaethol ar gyfer cynhyrchu ynni carbon isel. Mae, o bosib,l yn nodi dechrau cyfres o fuddsoddiadau cynhyrchu ynni sero-net ar yr ynys ac ar draws y rhanbarth ehangach.
Mae campysau Grŵp Llandrillo Menai wedi bod wrth wraidd yr agenda sgiliau niwclear ers dros 15 mlynedd, ar ôl gweithio gyda Horizon Nuclear Power, Magnox, ac ystod eang o bartneriaid cadwyn gyflenwi. Mae ei gyfleusterau blaenllaw yn y sector yn cynnwys y Ganolfan Ynni a'r Ganolfan Seilwaith, Sgiliau a Thechnoleg (CIST), y ddau yn Llangefni, yn ogystal â'r ganolfan Beirianneg o'r radd flaenaf yn y Rhyl a ddatblygwyd mewn partneriaeth ag RWE.
Ar lefel leol a chenedlaethol, mae Grŵp Llandrillo Menai yn gweithio gyda phartneriaid yn y diwydiant fel RWE, Engie, Morlais, NRS, a SPEN i ddarparu hyfforddiant a sgiliau ar draws y sectorau ynni carbon isel fel gwynt ar y môr; solar a hydrogen. Bydd dychweliad ynni niwclear i Ynys Môn yn ategu prosiectau carbon isel presennol a rhai yn y dyfodol ar yr ynys, ac yn cefnogi'r seilwaith ynni cenedlaethol.
Mae arbenigedd y Grŵp, a'i berthnasoedd hirdymor â phartneriaid yn y diwydiant a'r Llywodraeth, yn golygu ei fod mewn sefyllfa unigryw i helpu i lunio a chyflawni'r sgiliau, yr hyfforddiant a'r capasiti cadwyn gyflenwi sydd eu hangen ar gyfer prosiectau ynni ar Ynys Môn a rhanbarth ehangach gogledd-orllewin Cymru.
Dywedodd Aled Jones-Griffith, Prif Swyddog Gweithredu Grŵp Llandrillo Menai,
“Rydym yn croesawu’r cyhoeddiad hir-ddisgwyliedig bod Wylfa wedi’i dewis fel y safle ar gyfer yr adweithyddion modiwlaidd bach newydd.” Mae hyn yn nodi trobwynt hollbwysig i ffyniant Gogledd Cymru, gan agor cyfleoedd cyflogaeth sylweddol i'n cymunedau lleol a chenedlaethau'r dyfodol. Mae'n ddatblygiad cyffrous nid yn unig i Ynys Môn, ond i Ogledd Cymru gyfan, gyda'r potensial i drawsnewid ein heconomi ranbarthol am ddegawdau i ddod.”
“Yng Ngrŵp Llandrillo Menai, mae’r ffordd rydym yn gweithio yr un mor bwysig â’r gwaith a wnawn. Mae partneriaeth a chydweithio wrth wraidd ein dull gweithredu, ac mae ein hanes cryf o lwyddiant yn adlewyrchu’r perthnasoedd agos a hir rydym wedi’u meithrin gyda’n cymunedau, diwydiant, y sector cyhoeddus, a phartneriaid ar draws y rhanbarth. Mae ein nod yn syml ond yn bwerus - gwella dyfodol pobl a, thrwy wneud hynny, cryfhau ffyniant a bywiogrwydd ein heconomi a’n cymunedau.
“Rydym yn barod i adeiladu ar y partneriaethau presennol hyn, ac i greu rhai newydd, er mwyn sicrhau bod ein darpariaeth yn parhau i ddiwallu anghenion sgiliau a hyfforddiant y prosiect hwn drwy gydol ei oes.”
Ychwanegodd Dr Siôn Peters-Flynn, Pennaeth Coleg Menai a Choleg Meirion-Dwyfor,
“Yn allweddol i lwyddiant yr adweithyddion yn Wylfa fydd cyfraniad y gweithlu rhanbarthol. Rhaid i elfen ganolog o’r prosiect hwn fod ymrwymiad sylweddol a chynaliadwy i addysg a hyfforddiant pobl leol, yn enwedig pobl ifanc leol. Mae’n hanfodol bod y prosiect hwn yn cefnogi’r economi ranbarthol ac yn galluogi busnesau ac unigolion lleol i gael mynediad at lwybrau i waith â chyflog da a gyrfaoedd cynaliadwy.”
“Mae llwyddiant prosiect fel hwn yn dibynnu ar ei allu i gael cymunedau lleol i gefnogi a gyrru ei ddatblygiad. Mae helpu pobl leol i gaffael y sgiliau sydd eu hangen arnynt i lenwi’r ystod eang o rolau swyddi sy’n gysylltiedig â darparu a gweithredu cyfleuster fel Wylfa, yn hanfodol bwysig.”
