Gradd Sylfaen (FdSc) Cyfrifiadura (Datblygu Meddalwedd)

Mae'r cwrs hwn yn cyfuno sgiliau cyfrifiadura cyffredinol â modiwlau arbenigol sy'n canolbwyntio ar raglennu / datblygu meddalwedd. Am bob 10 credyd, dylai'r myfyrwyr gwblhau tua 100 o oriau dysgu tybiannol. Bydd tua 30% o hyn yn gyswllt dysgu uniongyrchol, a 70% yn ddysgu annibynnol. Mae'r cyfuniad hwn o fodiwlau'n arwain at Radd Sylfaen (FdSc) mewn Cyfrifiadura (Datblygu Meddalwedd). Mae cwrs Gradd Sylfaen arall ar gael sy'n arbenigo mewn Rhwydweithio.

Blwyddyn 1 (Lefel 4)

Systemau Cyfrifiadurol (10 credyd, gorfodol)
Mae systemau cyfrifiadurol modern yn pweru bron popeth a wnawn, o gyfathrebu i ddatblygu syniadau newydd. Yn y modiwl hwn, byddwch yn archwilio'r caledwedd a'r meddalwedd sy'n gwneud iddynt weithio, gan gael profiad ymarferol uniongyrchol (60% Portffolio, 40% Prawf llyfr caeedig yn y Dosbarth i'w Gwblhau mewn Amser Penodol (1 awr))

Creu a Rheoli Gwefannau Hygyrch (20 credyd, gorfodol)
Dewch â'ch dyluniadau gwe’n fyw yn y modiwl ymarferol hwn lle byddwch yn dysgu sut i ddefnyddio HTML5 a CSS3 i ddatblygu gwefannau proffesiynol a hygyrch. Byddwch yn codio o'r gwaelod i fyny, yn archwilio offer datblygu, ac yn cyflwyno eich gwefan orffenedig. Drwy hyn byddwch yn magu hyder ac yn meithrin y sgiliau sydd eu hangen i greu, cyhoeddi, a chynnal gwefannau modern sy'n cydymffurfio â'r safonau. (60% Creu gwefan â'i chyflwyno i weinydd – dogfen i'w phrosesu mewn cyfnodolyn, 20% Llawlyfr technegol, 20% Cyflwyniad)

Modelu Data (20 credyd, gorfodol)
Mae'r modiwl hwn yn cyflwyno'r prif gysyniadau, dulliau, a therminoleg a defnyddir wrth ddylunio systemau awtomataidd. Byddwch yn dysgu dadansoddi, dehongli, a chreu diagramau dylunio strwythuredig, gan ddatblygu sgiliau hanfodol i gefnogi Rhaglennu Gwrthrych-gyfeiriadol ar Lefel 5 ac i'ch paratoi ar gyfer dadansoddi uwch ym modiwlau rhaglennu a pheirianneg meddalwedd Lefel 6. (40% Adroddiad, 60% Adroddiad)

Dylunio a Rheoli Cronfeydd Data (10 credyd, gorfodol)
Mae'r modiwl hwn yn datblygu'r sgiliau sydd eu hangen i ddylunio, adeiladu, a chynnal cronfeydd data perthynol i'w defnyddio yn y byd go iawn. Byddwch yn dysgu sut i drefnu data'n effeithiol gan ddefnyddio ieithoedd ymholi fel SQL neu MySQL i greu, rheoli, a dadansoddi systemau cronni data, gan eich paratoi ar gyfer gweithio mewn amgylcheddau proffesiynol sy'n defnyddio cronfeydd data. (40% Adroddiad, 60% Adroddiad)

Dylunio Gwefannau Hygyrch
Mae'r modiwl hwn yn edrych ar sut i ddylunio gwefannau sy'n hygyrch, yn hawdd i'w defnyddio, ac yn gweithio'n effeithiol ar draws dyfeisiau a phlatfformau. Byddwch yn dysgu am egwyddorion allweddol rhyngweithio rhwng pobl a chyfrifiaduron, deddfwriaeth hygyrchedd, a dylunio ar gyfer dyfeisiau symudol yn gyntaf tra hefyd yn datblygu sgiliau ymarferol o ran safonau'r we, defnyddioldeb, ac optimeiddio graffeg i greu gwefannau proffesiynol a chynhwysol. (60% Dogfennu'r dylunio ar gyfer gwefan fach, 40% Cyflwyniad)

Cyflogaeth yn y Diwydiant Cyfrifiadura (10 credyd, gorfodol)
Mae'r modiwl hwn yn eich paratoi ar gyfer gyrfa yn y diwydiant cyfrifiadura drwy archwilio modelau gwaith proffesiynol a datblygu'r sgiliau i nodi a mynd ar drywydd cyfleoedd cyflogaeth. Bydd hefyd yn cryfhau eich gallu i ymchwilio a'ch hyder i ysgrifennu'n academaidd, meddwl yn feirniadol, adfyfyrio, a threfnu eich gwaith eich hun yn effeithiol. (30% Traethawd unigol, 50% Adroddiad, 20% Adfyfyrio unigol)

Cyflwyniad i Raglennu (20 credyd, gorfodol)
Mae'r modiwl hwn yn cyflwyno egwyddorion craidd rhaglennu cyfrifiaduron gan ddefnyddio ieithoedd fel Java, neu Python. Byddwch yn dysgu sut i ddadansoddi problemau, dylunio datrysiadau effeithiol, a datblygu rhaglenni sy'n gweithio, gan adeiladu sylfaen gadarn ar gyfer datblygu meddalwedd. (30% Adroddiad a datblygu rhaglenni syml, 30% Dylunio, codio a phrofi rhaglen, 40% Dylunio, codio a phrofi rhaglen gymhleth)

Hanfodion Systemau Gweithredu (10 credyd, gorfodol)
Mae gwybodaeth am systemau cyfrifiadurol yn hanfodol mewn unrhyw fusnes modern, a rhan annatod o bob system yw'r meddalwedd gweithredu. Mae'r modiwl hwn yn archwilio nodweddion a swyddogaethau Microsoft Windows a Linux, gan gyfuno gwaith theori a gwaith ymarferol i ddangos sut mae systemau gweithredu yn cefnogi ac yn rheoli gweithrediadau busnes o ddydd i ddydd. (40% Adroddiad, 60% Portffolio o 6 ymarfer labordy sy'n gyfartal eu gwerth)

Blwyddyn 2 (Lefel 5)

Prosiect Ymchwil yn y Diwydiant Cyfrifiadura (20 credyd, gorfodol)
Yn y modiwl hwn, byddwch yn datblygu eich sgiliau ymchwilio ym maes Cyfrifiadura drwy ganolbwyntio ar brosiect estynedig micro. Byddwch yn dysgu defnyddio dulliau ymchwilio addas, yn dangos sgiliau ysgrifennu academaidd a dadansoddi cadarn, ac yn archwilio moeseg broffesiynol, fel eich bod yn barod i astudio ar Lefel 6 neu i wneud gwaith ymchwil mewn gyrfa ym maes cyfrifiadura (10% Ffurflen i Gynnig Traethawd Estynedig Micro, 10% Cyflwyniad, 80% Traethawd Estynedig Micro)

Seiberddiogelwch a Thechnolegau'r Dyfodol (20 credyd, gorfodol)
Mae'r traethawd hwn yn archwilio sut mae diogelwch, moeseg, a chyfrifoldebau cyfreithiol yn llunio sut mae technolegau cyfrifiadurol yn cael eu defnyddio. Byddwch yn archwilio safonau allweddol, technolegau newydd, a'u heffaith ar gymdeithas, gan gael golwg ar ymchwil gyfredol a chymwysiadau go iawn mewn diwydiant a masnach. (70% Adroddiad, 30% Cyflwyniad)

Datblygu Technoleg i Ddyfeisiau Symudol (20 credyd, gorfodol)
Mae'r modiwl hwn yn cyflwyno'r prif gysyniadau a phrosesau sy'n rhan o ddatblygu rhaglenni ar gyfer dyfeisiau symudol. Gan ddefnyddio offer fel Android Studio, App Inventor, neu Xamarin, byddwch yn cael profiad ymarferol o ddylunio, adeiladu, a phrofi apiau tra hefyd yn dysgu sut i fynd i'r afael â'r heriau unigryw sy'n rhan o ddatblygu technoleg symudol. (30% Cynhyrchu rhaglen syml i ddyfais symudol, 20% Dylunio rhaglen i ddyfais symudol, 50% Cynhyrchu a phrofi rhaglen i ddyfais symudol)

Prosiect Cyflogadwyedd (20 credyd, gorfodol)
Mae'r modiwl hwn yn rhoi cyfle i chi roi sgiliau a gwybodaeth Lefel 4 ar waith drwy leoliad gwaith neu brosiect. Byddwch yn creu cynllun datblygu personol, yn ystyried eich nodau gyrfaol, ac yn cwblhau prosiect ymarferol neu gyfnod ar leoliad gwaith. Drwy hyn byddwch yn ennill profiadau gwerthfawr, yn gwella eich cyflogadwyedd, ac yn magu hyder i fynd ymlaen i yrfa ym maes cyfrifiadura. (20% Cynllun Datblygu Personol a Phroffesiynol, 10% Cynnig ar gyfer Lleoliad Gwaith, 70% Dogfennu'r lleoliad gwaith / prosiect ac adfyfyrdod)

Cyflwyniad i Ganolwedd (10 credyd, gorfodol)
Mae'r modiwl hwn yn cyflwyno egwyddorion craidd datblygu canolwedd a sut y mae rhaglenni gwe yn cysylltu defnyddwyr â chronfeydd data ochr y gweinydd. ⁠Byddwch yn defnyddio PHP i ddylunio ac adeiladu datrysiadau dynamig, gan ddysgu sut mae ffurflenni gwe yn rhyngweithio â data a storiwyd o ddadansoddi problemau cychwynnol i'r gweithrediad terfynol. (30% Datblygu rhaglen syml, 70% Dylunio, codio a phrofi rhaglen)

Rhaglennu Gwrthrych-gyfeiriadol (20 credyd, craidd)
Mae'r modiwl hwn yn cyflwyno egwyddorion rhaglennu gwrthrych-gyfeiriadol a sut maent yn cael eu cymhwyso i greu datrysiadau meddalwedd effeithiol. ⁠Byddwch yn dysgu dylunio a datblygu rhaglenni gwrthrych-gyfeiriadol gan ddefnyddio iaith briodol. Trwy hyn byddwch yn datblygu dealltwriaeth o'r cysyniadau allweddol, o'r dylunio cychwynnol i'r gweithrediad terfynol. (30% Dylunio, creu a phrofi rhaglen fach unigol, 70% Dylunio, creu a phrofi rhaglen gwrthrych-gyfeiriadol gymhleth sy'n seiliedig ar ddata)

Rheoli Prosiectau i Rai sy'n Gweithio ym maes Cyfrifiadura (10 credyd, gorfodol)
Mae'r modiwl hwn yn cyflwyno prif egwyddorion ac arferion rheoli prosiectau. ⁠Byddwch yn archwilio methodolegau a ddefnyddir yn helaeth i reoli prosiectau ac yn dysgu sut i gynllunio, rheoli a chyflawni prosiectau'n effeithiol trwy bob cam o'u cylch bywyd. (40% Adroddiad, 60% Adroddiad)