Prentisiaeth - Gosod Trydan Lefel 3

Mae prentisiaeth mewn Gosod Trydan yn gwrs 4 ½ blynedd lle rydych chi'n cael eich cyflogi gan gwmni gosod trydan neu gwmni adeiladu ac yn mynychu'r coleg 1 diwrnod yr wythnos.

Tra byddwch ar y safle gyda'ch cyflogwr byddwch yn meithrin sgiliau a phrofiad o weithio ar dasgau gosod trydan. Ar y dechrau, byddwch yn gwneud tasgau lefel isel ac yn helpu trydanwr cymwys i wneud eu gwaith; ond dros amser, byddwch yn ennill profiad fel y gallwch gefnogi eich cyflogwr i osod, cynnal a chadw ac atgyweirio systemau trydanol eich hun. Gall hyn gynnwys systemau pŵer, gwresogi, goleuadau, systemau diogelwch a thechnolegau ynni adnewyddadwy.

Ar ddiwedd y cwrs, byddwch yn cael eich asesu ar y safle yn gwneud amrywiaeth o dasgau gosod trydan. Dyma'r “Prosiect Ymarferol Terfynol” lle bydd asesydd o'r coleg yn ymweld â chi am nifer o ddyddiau i gadarnhau eich cymhwysedd.

Byddwch yn mynychu'r coleg un diwrnod yr wythnos drwy gydol eich prentisiaeth. Bydd yr wythnosau yn y coleg ar sail blwyddyn academaidd arferol. Yn y coleg cewch gymysgedd o theori yn yr ystafell ddosbarth a sesiynau ymarferol mewn gweithdai.

Bydd yr elfen theori yn cwmpasu pob agwedd ar y diwydiantgosod trydan, a'r diwydiant adeiladu. Bydd y sgiliau a'r wybodaeth y byddwch yn eu datblygu yn y coleg yn atgyfnerthu eich profiad ar safleoedd gwaith. Bydd gofyn i chi sefyll hyd at dri arholiad cwestiynau amlddewis ar-lein a chael 45 munud o Drafodaeth Broffesiynol gydag arholwr allanol. Dim ond un asesiad ymarferol a gynhelir tra byddwch chi yn y coleg.