Gradd Sylfaen (FdSc) Celf 3D a Datblygu Gemau

Gwybodaeth am yr Uned

Am bob 10 credyd, dylai myfyrwyr ymgysylltu â thua 100 o oriau tybiannol o ddysgu. Bydd hyn oddeutu 30% o gyswllt dysgu uniongyrchol a 70% o ddysgu annibynnol i fyfyrwyr.

Mae'r cwrs yn cynnwys y modiwlau a ganlyn:

Lefel 4

Hanfodion Celf Amgylcheddol (10 Credyd)
Nod y modiwl hwn yw cyflwyno'r myfyrwyr i hanfodion celf amgylcheddol, gan drafod cysyniadau creiddiol fel blociau, trimiadau, a phecynnau modiwlaidd. Bydd y myfyrwyr yn meithrin sgiliau ymarferol wrth greu cyfrannau realistig ac arddulliadol, tra hefyd yn edrych ar brif egwyddorion adrodd stori o fewn amgylchedd gemau.

Egwyddorion Dylunio Gemau (10 Credyd)
Bwriad y modiwl yw cyflwyno'r myfyrwyr i egwyddorion dylunio gemau a phrofiadau rhyngweithiol apelgar. Bydd y myfyrwyr yn cael eu tywys trwy ddulliau amrywiol o ddylunio gemau a'r profiad gêm cyffredinol, gan gynnwys creu lefelau a bydoedd. Bydd y modiwl hefyd yn trafod arferion gorau o ran dylunio profiad defnyddwyr, dylunio hygyrch, profiad gêm, dylunio systemau a strategaethau monoteiddio.

Ymchwilio i'r Profiad Gêm (10 Credyd)
Bwriad y modiwl yw datblygu a chryfhau gallu'r myfyrwyr i ymchwilio er mwyn cefnogi eu prosiectau a chyfiawnhau eu penderfyniadau. Gwneir hyn trwy ddefnyddio ymchwil drwyadl, ysgrifennu academaidd, confensiynau academaidd a thrwy gyflwyno'r dysgwyr i sut mae meddwl yn feirniadol.

Cynhyrchu mewn Grŵp (20 Credyd)
Nod y modiwl hwn yw cyflwyno gwybodaeth ehangach am y diwydiant gemau a sut i fod yn rhan ohono, tra hefyd yn edrych at sut i wella a datblygu sgiliau meddal y myfyrwyr. Bydd y modiwl yn trafod materion yn ymwneud â chyflogadwyedd yn ogystal â datblygiad y sector annibynnol a manteision bod yn hunangyflogedig.

Bydd y modiwl yn edrych ar brosiectau sy'n datblygu yn y diwydiant fel Tranzfuser, UK Games Fund, Grads in Games, a Global Game Jams, sut maent yn cefnogi myfyrwyr a beth yw eu manteision. Byddwn yn edrych ar effaith economaidd y diwydiant a sut y bydd gemau'n llunio'r wlad/byd.

Cyflwyniad i Fodelu 3D (20 Credyd)
Bydd y modiwl hwn yn cyflwyno'r myfyrwyr i dechnegau sylfaenol modelu 3D, gan ganolbwyntio ar greu asedau ar gyfer gemau. Bydd y myfyrwyr yn archwilio ystod o lifoedd gwaith, gan ennill dealltwriaeth gadarn o theori geometrig ac amrywiaeth o ddulliau modelu. Trwy waith ymarferol bydd y myfyrwyr yn meithrin y sgiliau i allu cynhyrchu modelau 3D o safon uchel sy'n addas ar gyfer rhaglenni polygon uchel ac isel.

Cyflwyniad i Animeiddio (10 Credyd)
Bydd y modiwl hwn yn cyflwyno sgiliau creiddiol Animeiddio 3D. Bydd y myfyrwyr yn archwilio ac yn defnyddio 12 egwyddor animeiddio, gan ganolbwyntio ar baratoi animeiddiadau i'w defnyddio mewn injan gemau a phlatfformau creadigol eraill.

Cyflwyniad i Ddatblygu Gemau (20 Credyd)
Mae'r modiwl hwn yn cyflwyno'r myfyrwyr i gysyniadau ac egwyddorion sylfaenol datblygu gemau gan ddefnyddio injan gemau. Bydd y myfyrwyr yn dysgu sut i greu profiad gêm rhyngweithiol trwy ddefnyddio technegau creiddiol i raglennu, gan gynnwys sgriptio a thrin digwyddiadau. Bydd y myfyrwyr yn cael sylfaen gadarn yn yr egwyddorion codio sydd eu hangen i adeiladu mecaneg gêm a phrofiad defnyddiwr apelgar.

Profiad Chwaraewyr (20 Credyd)
Mae'r modiwl hwn yn archwilio egwyddorion ac arferion dylunio profiad defnyddiwr mewn gemau. Bydd y myfyrwyr yn meithrin sgiliau i ddylunio a defnyddio rhyngwynebau defnyddwyr (UI), systemau oedi, integreiddio sain, animeiddiadau mewnol i'r peiriant, ac effeithiau gweledol. Rhoddir pwyslais ar wella ymgysylltiad y chwaraewr a throchi trwy nodweddion gêm greddfol ac ymatebol.

Lefel 5

Crefft Goleuo (10 Credyd)
Nod y modiwl hwn yw galluogi'r myfyrwyr i oleuo, rendro a chyflwyno’u gwaith i safon broffesiynol. Bydd y myfyrwyr yn meithrin gwybodaeth a dealltwriaeth bellach o'r broses oleuo ar gyfer canlyniadau amrywiol, a'r broses rendro sy'n caniatáu iddynt gael eu gweld.

Dylunio Cymeriadau (10 Credyd)
Mae'r modiwl hwn yn cyflwyno'r myfyrwyr i egwyddorion a thechnegau dylunio cymeriadau, gan ganolbwyntio ar yr hyn sy'n gwneud cymeriad yn addas ar gyfer gemau. Bydd y myfyrwyr yn edrych ar bwysigrwydd llif ymylol, topoleg, a mapio UV wrth greu cymeriadau wedi'u hoptimeiddio ar gyfer gemau.

Datblygu Gemau (20 Credyd)
Bydd y modiwl hwn yn ymestyn gwybodaeth bresennol y myfyrwyr am ddylunio a datblygu gemau. Gan adeiladu ar y ddwy ddisgyblaeth hyn, bydd y myfyrwyr yn gallu datblygu gemau gwreiddiol sy'n amrywio o ran cymhlethdod. Bydd y myfyrwyr yn dysgu sut i baratoi amlinelliad o brosiect, a sut i gynllunio, creu a phrofi'r prosiectau terfynol i gam datblygu beta o leiaf. Bydd myfyrwyr yn dysgu am bwysigrwydd ymddygiadau NPC (Non-Player Character), a chreu profiad gêm sy'n ymateb i ddulliau chwarae'r chwaraewr.

Prosiect Ymchwil yn gysylltiedig â'r Diwydiant Gemau (20 Credyd)
Nod y modiwl yw rhoi cyfle i'r myfyrwyr ddefnyddio amrediad o sgiliau ymchwilio priodol i astudio'r diwydiannau creadigol yn gyffredinol a datblygu gemau yn benodol. Trwy greu cynnig a phoster academaidd, bydd y modiwl yn eu paratoi i astudio ymhellach ar Lefel 6, neu i gael gyrfa fel ymchwilydd.

Prosiect Seiliedig ar Fethodoleg (20 Credyd)
Nod y modiwl hwn yw rhoi profiad ymarferol i'r myfyrwyr o gynllunio a gweithredu prosiect gemau wrth ddilyn methodoleg a ddewiswyd ganddynt. Bydd y myfyrwyr yn dysgu am amrywiaeth o ddulliau gweithio cyfredol a bydd disgwyl iddynt wneud dewis gwybodus ar ba fethodoleg a fyddai'n gweddu i brosiect eu grŵp. Bydd gweithio mewn grŵp yn caniatáu i brosiect mwy gael ei gyflawni nag a fyddai'n ymarferol wrth weithio'n unigol. Bydd unigolion yn cyfrannu at ddyluniad cychwynnol y prosiect ac yna'n cyflawni tasgau y cytunwyd arnynt i gwblhau'r cynnyrch. Mae'r modiwl yn pwysleisio pwysigrwydd cael cynllun prosiect cydlynol, adolygu cynnydd yn rheolaidd a gweithio mewn grŵp yn effeithiol.

Datblygu Platfformau Cymysg (20 Credyd)
Bydd y modiwl hwn yn cyflwyno'r myfyrwyr i ddatblygiad rhaglenni ar draws platfformau symudol, realiti rhithwir (VR), a realiti estynedig (AR). Trwy arbrofi ymarferol, bydd y myfyrwyr yn archwilio'r nodweddion, yr heriau, a'r cyfleoedd unigryw sy'n gysylltiedig â phob platfform. Erbyn diwedd y modiwl, byddant yn dylunio a datblygu rhaglen sylfaenol ar gyfer platfform o'u dewis, gan ddefnyddio sgiliau a methodolegau sy'n berthnasol i'r diwydiant. Bydd y myfyrwyr yn dysgu sut i fynd ati'n gywir i ddatblygu cynnwys ar gyfer realaeth gymysg a pha lyfrgelloedd rhaglennu fydd angen iddynt eu defnyddio.

Dylunio Propiau (10 Credyd)
Canolbwyntia'r modiwl hwn ar ddylunio a chreu propiau 3D. Bydd y myfyrwyr yn astudio egwyddorion dylunio amrywiol gan greu asedau gweithredol sy'n weledol apelgar. Rhoddir pwyslais ar integreiddiad piblinellau a dylanwad cyd-destunau hanesyddol a diwylliannol ar greu propiau ystyrlon y gellir ymgolli ynddynt.

Dylunio a Defnyddio Gwead (10 Credyd)
Bydd y modiwl hwn yn meithrin ymhellach allu'r myfyrwyr i greu gweadau a deunyddiau y gallant eu cymhwyso i fodelau presennol. Bydd y myfyrwyr yn dod i ddeall y prosesau o greu deunyddiau a gweadau PBR o'r dechrau, ac yn defnyddio meddalwedd diwydiant safonol a pherthnasol i gynorthwyo'r broses.