Cymdeithas Cyfrifwyr Siartredig (ACCA)

Hoffech chi gael gyrfa heriol a gwerth chweil ym maes cyfrifyddu, cyllid neu fusnes?

Mae'r galw am weithwyr proffesiynol cymwys ym maes cyfrifyddu yn parhau i dyfu yn y DU ac yn fyd-eang. Mae angen gweithwyr proffesiynol cyllid medrus ar sefydliadau o bob maint i gefnogi gwneud penderfyniadau, sicrhau cydymffurfiaeth a gyrru llwyddiant busnes.

Mae cymhwyster gan yr ACCA (Cymdeithas y Cyfrifwyr Ardystiedig Siartredig) yn eich paratoi i ddod yn weithiwr proffesiynol cyllid y mae mawr alw amdanynt ac yn agor y drws i ystod eang o yrfaoedd ym maes cyfrifyddu, archwilio, trethiant, bancio a rheolaeth.

Fel Partner Dysgu yr ACCA sydd wedi'i Gymeradwyo â Safon Aur, mae Grŵp Llandrillo Menai yn bodloni safonau aur yr ACCA ar gyfer cyflwyno cyrsiau, rhoi cymorth i fyfyrwyr a sicrhau llwyddiant mewn arholiadau.

Drwy gydol y cwrs byddwch yn elwa o amgylchedd dysgu cefnogol, adnoddau dysgu modern a thiwtoriaid profiadol sy'n dod â gwybodaeth am y diwydiant i'r ystafell ddosbarth ar-lein.

Mae'r cwrs yn rhoi'r wybodaeth dechnegol hanfodol sydd ei hangen arnoch i lwyddo yn y sector cyfrifyddu a chyllid. Byddwch yn datblygu gwybodaeth a chymhwysiad ymarferol ym meysydd craidd cyfrifyddu, gan gynnwys adrodd ariannol, cyfrifyddu ym maes rheoli, trethiant ac archwilio, gan ymgorffori dulliau strategol o ymdrin â chyllid a chyfrifyddu.

Ochr yn ochr ag arbenigedd technegol, byddwch yn datblygu sgiliau proffesiynol sy'n hanfodol ar gyfer dilyniant gyrfa, gan gynnwys cyfathrebu, gwneud penderfyniadau moesegol, datrys problemau a gwaith tîm. Byddwch yn graddio gyda'r wybodaeth, yr hyder a'r meddylfryd proffesiynol a ddisgwylir gan gyflogwyr, gan gynnwys practisau cyfrifyddu, sefydliadau gwasanaethau ariannol, cyrff y sector cyhoeddus a busnesau masnachol. Yn ogystal â datblygu'r sgiliau sydd eu hangen arnoch i gefnogi rolau hunangyflogedig, ymgynghori neu lawrydd ym maes cyllid.

Cyflwynir cymhwyster yr ACCA ar draws sawl lefel o'r fframwaith cymwysterau, gan eich galluogi i ddatblygu eich gwybodaeth a'ch sgiliau'n raddol. Mae pob cam yn adeiladu ar eich dysgu blaenorol, gan symud o egwyddorion cyfrifyddu craidd hyd at alluoedd proffesiynol a strategol uwch.

Mae'r modiwlau'n cynnwys:

Gwybodaeth Gymhwysol (Lefel 4)

• Busnes a Thechnoleg (BT)
• Cyfrifyddu ym maes Rheoli (MA)
• Cyfrifyddu Ariannol (FA)

Sgiliau Cymhwysol (Lefel 6)

• Cyfraith Gorfforaethol a Busnes (LW)
• Rheoli Perfformiad (PM)
• Trethiant (TX)
• Adrodd Ariannol (FR)
• Archwilio a Sicrhau Ansawdd (AA)
• Rheoli Cyllid (FM)

Lefel Broffesiynol Strategol (Lefel 7)

Craidd

• Arweinydd Busnes Strategol (SBL)
• Adroddiadau Busnes Strategol (SBR)

(Dewisol x 2)

• Rheoli Ariannol Uwch (AFM)
• Rheoli Perfformiad Uwch (APM)
• Trethiant Uwch (ATX)
• Archwilio a Sicrhau Ansawdd Uwch (AAA)

Gwybodaeth Ychwanegol

I ddod yn Aelod o'r ACCA mae'n ofynnol i chi gwblhau'r holl arholiadau, Modiwl Moeseg a Sgiliau Proffesiynol (EPSM), a Phrofiad Ymarferol Gofynnol (PER). Os mai dim ond y PER sy'n weddill, yna dyfernir statws Cyswllt ACCA.

Modiwl ar Foeseg a Sgiliau Proffesiynol (EPSM) - mae hwn yn fodiwl ar-lein gorfodol 15–20 awr a gwblheir yn uniongyrchol gyda'r ACCA. Fe'i cynlluniwyd i ddatblygu sgiliau moesegol, proffesiynol a busnes drwy senarios byd go iawn.

Profiad Ymarferol Gofynnol (PER) - mae hwn yn gydran orfodol ar gyfer aelodaeth lawn o'r ACCA ac mae'n gofyn am 36 mis o brofiad perthnasol ym maes cyfrifyddu neu gyllid, ochr yn ochr â chwblhau naw amcan perfformiad (pump hanfodol a phedwar technegol).

Am ragor o wybodaeth anfonwch e-bost i: acca@gllm.ac.uk