Rhifedd Byw - Lluosi: Cyrsiau Mathemateg i Oedolion

Beth yw prosiect Lluosi?

Rhaglen newydd yw Lluosi i helpu oedolion i fod yn fwy hyderus wrth ddefnyddio rhifau yn eu bywyd bob dydd. Mae’r prosiect yn cynnig mynediad hawdd i ystod eang o gyrsiau mathemateg AM DDIM ar draws Gogledd Cymru.

Os oes arnoch angen cymorth i reoli eich arian, i fod yn gefn i’ch plant gyda’u gwaith cartref, neu i wella eich cyfleoedd yn y gwaith, gallwn ni eich helpu.

Pwy all gael yr hyfforddiant?
⁠Mae rhaglen Lluosi wedi'i hanelu'n bennaf at drigolion siroedd Gwynedd, Môn, Conwy neu Ddinbych sy'n 19 oed neu'n hŷn a heb gymhwyster lefel 2 mewn mathemateg, h.y. o leiaf TGAU gradd C neu gyfwerth.

Mae’r meini prawf wedi'u hehangu i gynnwys unigolion sydd wedi cyflawni cymhwyster lefel 2 neu uwch mewn mathemateg ond nad ydynt bellach yn gweithio ar y lefel honno ac fe hoffent wella eu sgiliau mathemateg:

• I'w helpu i gael swydd.
• I'w helpu i symud ymlaen yn eu gyrfa.
• I'w helpu i symud ymlaen i ddysgu ar lefel uwch.

Mae'r cymorth ar gael am ddim i unigolion, grwpiau cymunedol, mentrau cymdeithasol, sefydliadau a busnesau.

Cysylltwch â ni os oes gennych unrhyw gwestiynau, neu os nad ydych yn siŵr a ydych yn gymwys.

Mae’r prosiect hwn yn cael ei gyllido gan Lywodraeth y DU drwy Gronfa Ffyniant Gyffredin y DU.

Grŵp Llandrillo Menai sy'n arwain prosiect Lluosi yn siroedd Gwynedd, Môn, Conwy a Dinbych.

Rhaglen hyfforddi arloesol a ariennir drwy Gronfa Ffyniant Gyffredin Llywodraeth y Deyrnas Unedig yw Lluosi a'r bwriad yw helpu pobl i wella eu dealltwriaeth a'u defnydd o fathemateg yn eu bywyd bob dydd, gartref ac yn y gwaith. Efallai eu bod am wneud hynny i wella'r sefyllfa ariannol yn y cartref, i helpu eu plant gyda'u gwaith cartref, i ddeall y ffeithiau a gyflwynir ar y cyfryngau'n well neu i wella'r sgiliau rhifedd penodol sydd eu hangen arnynt yn eu gwaith.