BA (Anrh) Celf Gain

Disgrifiad cwrs

Mae'r BA mewn Celf Gain yng Ngholeg Menai yn anelu at fod yn brofiad heriol a chyffrous wedi ei addysgu gan artistiaid wrth eu gwaith gydag sydd ag enw da yn genedlaethol ac yn rhyngwladol. Mae'r cwrs hwn yn cynnig i ddysgwyr y cyfle i archwilio themâu, syniadau a diddordebau creadigol personol drwy amrywiaeth eang o ddisgyblaethau gan gynnwys: lluniau, paentiadau cerflunio, gwneud printiau a gweithgareddau aml-gyfryngol.

Mae modylau Dyfodol Creadigol yn datblygu amrywiol brosiectau gyda phartneriaid a sefydliadau allanol; mae'r rhain yn arfogi dysgwyr gyda dealltwriaeth o'r cyfleoedd ehangach ar gyfer galwedigaeth o fewn y sector Celfyddydau.

Gwybodaeth am yr unedau

Am bob 10 credyd, dylai myfyrwyr ymgysylltu â thua 100 o oriau tybiannol o ddysgu. Bydd hyn oddeutu 30% o gyswllt dysgu uniongyrchol a 70% o ddysgu annibynnol i fyfyrwyr.

Blwyddyn 1 (Lefel 4)

Ymchwil Gweledol mewn Celfyddyd Gain (20 credyd, gorfodol)

Drwy raglenni gwaith unigol bydd y modiwl hwn yn trafod prosesau casglu gwybodaeth a gwella lluniadau. Bydd hyn yn cynnwys cyflwyniad i iaith weledol a sut mae ymateb yn weledol i amrywiaeth o ffynonellau. Ymdrinnir yn eang ag ymchwil gweledol a bydd hyn yn cynnwys gweithio'n wrthrychol ac yn fynegiannol gan fod yn barod i arbrofi a chymryd risgiau gyda gwahanol ddefnyddiau 2D a 3D. Portffolio 100%.

Defnyddiau a Dulliau 1 (20 credyd, craidd)

Nod y modiwl hwn yw annog myfyrwyr i ystyried y gwahanol ddefnyddiau a dulliau mynegiant a ddefnyddir mewn celf weledol gyfoes. Bydd yn eu galluogi i feithrin sgiliau meddwl a threfnu, yn ogystal â sgiliau sydd eu hangen i weithio'n annibynnol ac yn gydweithredol. Byddant hefyd yn meithrin gallu technegol mewn amrywiaeth o sgiliau ymarferol fydd yn golygu bod ganddynt wybodaeth sylfaenol dda am arferion gwaith ac iechyd a diogelwch. Bydd myfyrwyr yn dysgu adnabod y rhyngweithio rhwng deunyddiau, prosesau a syniadau ac ystyried sut y gellir mynegi eu syniadau gweledol eu hunain trwy ddulliau a deunyddiau priodol. Portffolio 100%.

Cysyniadau ac Ymarfer mewn Celfyddyd Gain (20 credyd, gorfodol)

Nod y modiwl hwn yw annog a datblygu gallu myfyrwyr i ymchwilio a myfyrio, meddwl yn feirniadol a chymryd risgiau, gan sefydlu fframwaith ar gyfer trafod deunyddiau ymchwil. Caiff myfyrwyr eu cyflwyno i amrywiaeth o gyfyngau, dulliau ymarfer a strategaethau a fydd yn eu galluogi i ddatblygu canlyniadau gwahanol o ddeunyddiau ymchwil, yn ogystal â meithrin y sgiliau i gofnodi drwy ymchwil weledol a chysyniadol. Portffolio 100%.

Dadadeiladu ac Ailadeiladu (20 credyd, gorfodol)

Nod y modiwl yw rhoi dealltwriaeth i fyfyrwyr o'r sail resymegol sydd yn gefndir i wneud a dadwneud a phwysigrwydd y berthynas rhwng dadadeiladu ac adeiladu, yn ddeallusol ac yn ymarferol. Bydd hyn yn annog a datblygu gallu myfyrwyr i ymchwilio, myfyrio a meddwl yn feirniadol gan eu cynorthwyo i benderfynu sut y gall y defnydd o ddefnyddiau a phrosesau, strategaethau a dulliau ymarfer gyfrannu at wireddu bwriadau creadigol. Portffolio 100%.

Cyd-destun Safle ac Ymarfer 1 (20 credyd, craidd)

Nod y modiwl hwn yw meithrin dealltwriaeth myfyrwyr o waith celf cyfoes drwy ymchwilio i ymarfer proffesiynol a'r broses waith mewn perthynas â chyd-destunau ffisegol a/neu gymdeithasol. Bydd yn annog myfyrwyr i ddatblygu eu hiaith weledol eu hunain y tu allan i'r stiwdio mewn perthynas â lleoliad ac ymateb cynulleidfa. Bydd hefyd yn gwneud iddynt feddwl ynghylch arwyddocâd cymdeithasol a gwleidyddol eu gwaith o ran ei gyd-destun a'i leoliad. Portffolio 50%, Blog 50%.

Rhoi Ymarfer Cyfredol mewn cyd-destun 1 (20 credyd, craidd)

Mae'r modiwl hwn yn galluogi myfyrwyr i lunio fframwaith beirniadol ar gyfer eu gwaith stiwdio. Y nod yw cyflwyno'r trafodaethau hanesyddol a'r materion cyfoes sy'n dylanwadu ar gelfyddyd gain gyfoes, ac annog myfyrwyr i feddwl yn feirniadol ac yn gyd-destunol. Bydd yn ennyn diddordeb myfyrwyr mewn ymchwil fel elfen hanfodol o'u gwaith ac yn eu cyflwyno i'r iaith feirniadol sy'n angenrheidiol i drafod cyd-destun eu gwaith ar lafar a thrwy ysgrifennu'n adfyfyriol. Cyflwyniad 25%, Blog 25%, Traethawd 50%.

Blwyddyn 2 (Lefel 5)

Ymchwil ac Ymarfer (30 credyd, gorfodol)

Bydd y modiwl hwn yn annog myfyrwyr i ddatblygu dull ymchwiliol a dadansoddol beirniadol i ddatblygiad a synthesis theori ac ymarfer yn eu gwaith eu hunain a gwaith eraill. Mae'r modiwl hwn yn anelu at fabwysiadu dull myfyriol a gwerthusol at ddatblygiadau yn codi o ymarfer creadigol unigolion, gan eu galluogi i ddatblygu iaith bersonol. Mae'r modiwl hwn yn cynyddu cyfrifoldeb myfyrwyr am gyfeiriad astudiaeth a lleoliad ymarfer ac yn eu paratoi ar gyfer astudio mwy annibynnol ar Lefel 6. Portffolio 80%, Cyflwyniad 20%.

Datblygu Gwaith Stiwdio (30 credyd, gorfodol)

Mae'r modiwl hwn yn hyrwyddo defnydd effeithiol myfyrwyr o'r stiwdio i ddatblygu eu hymarfer Celfyddyd Gain unigol. Mae'r modiwl yn adeiladu ar y profiad a enillwyd ar lefel 4 ac yn gyfrwng i ddewis gwaith i arbenigo arno er mwyn gwireddu uchelgais greadigol bersonol. Drwy broses o ddatblygiad parhaus sy'n seiliedig ar ymchwil ac ymarfer, cefnogir myfyrwyr i ymestyn eu syniadau eu hunain drwy arbrofi pellach. Drwy hyn byddant yn datblygu ac yn ymestyn eu hiaith ffurfiol eu hunain yng nghyd-destun Celfyddyd Gain gyfoes. Portffolio 100%.

Defnyddiau a Dulliau 2 (20 credyd, gorfodol)

Yn y modiwl hwn, adeiledir ar weithdai lefel 4 blaenorol ar Waith Lens, Cerflunio, Gwneud Printiau, a Chyfryngau Digidol. Bydd dysgwyr yn ehangu eu gwybodaeth o amrediad o brosesau, defnyddiau a thechnegau lefel 4 ac yn rhoi sylw i gyfarwyddiadau iechyd a diogelwch perthnasol. Cefnogir y modiwl hwn gan y gwaith thematig unigol a wna myfyrwyr yn y stiwdio. Portffolio 100%. Portffolio 50%, Blog 50%.

Cyd-destun Safle ac Ymarfer 2 (20 credyd, gorfodol)

Bwriad y modiwl hwn yw helpu myfyrwyr i feithrin y sgiliau fydd arnynt eu hangen i weithio'n broffesiynol. Bydd yn datblygu ac yn gwella strategaethau perthnasol ar gyfer cynllunio, curadu, arddangos a dogfennu gwaith mewn gwahanol ffyrdd, yn cynnwys cyhoeddi ac arddangos drwy gyfryngau analog, digidol ac ar-lein. Drwy brofi a phenderfynu ar strategaethau perthnasol ar gyfer gwneud ac arddangos gwaith ymarferol i gyd-fyfyrwyr, staff addysgu a chynulleidfaoedd allanol, byddant yn datblygu ymwybyddiaeth bellach o bwysigrwydd golygu, gwerthuso ac addasu gwaith maent wedi ei wneud mewn cyd-destunau penodol. Portffolio 50%, Blog 50%.

Rhoi Ymarfer Cyfredol mewn Cyd-destun 2 (20 credyd, gorfodol)

Mae'r modiwl hwn yn adeiladu ar y gwaith o edrych ar y cyd-destun hanesyddol a wnaed ar lefel 4. Caiff dulliau cyfoes o Ymarfer Celfyddyd Gain eu harchwilio, eu trafod a'u harddangos. Mae'n cefnogi gwaith pellach gan fyfyrwyr drwy ehangu eu dealltwriaeth o ddatblygiadau thematig mewn Celfyddyd Gain gyfoes drwy roi cyfle iddynt ymweld ag arddangosfeydd, cymryd rhan mewn trafodaethau a gwrando ar gyflwyniadau seminar. Bydd myfyrwyr yn edrych ar dueddiadau thematig mewn ôl-foderniaeth er mwyn deall datblygiad a sefyllfa gyfoes eu gwaith stiwdio. Ceir pwyslais ar feithrin sgiliau dadansoddol a beirniadol allweddol, yn ogystal â sgiliau ymchwil. Gwneir hyn drwy ganolbwyntio ar ffynonellau gweledol, testunau hanesyddol ac ysgrifennu beirniadol cyfoes. Bydd myfyrwyr yn dechrau dod i adnabod y deunyddiau sydd eu hangen i drafod, cysyniadu ac adfyfyrio ar eu gwaith eu hunain. Cyflwyniad 25%, Blog 25%, Traethawd 50%.

Blwyddyn 3 (Lefel 6)

Astudio'n Annibynnol - Ymchwilio a Chreu (40 credyd, gorfodol)

Prif fwriad y modiwl anrhydedd cyntaf hwn yw rhoi sylfaen ddeallusol ac ymarferol i fyfyrwyr allu meithrin a datblygu eu gwaith drwy fodloni gofynion ymarferol yr arddangosfa Radd a gynhelir ar ddiwedd y Modiwl Arddangosfa. Mae'r gallu i gyfuno'r gwahanol elfennau sy'n rhan o broses celfyddyd gain ac ymateb yn greadigol yn hanfodol i baratoi myfyrwyr ar gyfer bywyd yn gweithio ym myd celf y tu allan i'r sector addysg. Bydd myfyrwyr yn cynllunio, negodi ac yn cwblhau corff o waith. Portffolio 100%.

Lleoli Ymarfer proffesiynol 3 (20 credyd, gorfodol)

Yn ystod cam hwn y cwrs, bydd myfyrwyr yn cymryd mwy o gyfrifoldeb am waith cynllunio a threfnu. Gan adeiladu ar yr hyn maent eisoes wedi'i ddysgu am gyflwyno'u gwaith yn broffesiynol i gynulleidfa, yn y modiwl hwn bydd myfyrwyr yn datblygu eu sgiliau arddangos a'u gallu i ddogfennu a chyfathrebu mewn ffordd sy'n cyd-fynd â'u nodau proffesiynol unigol. Portffolio 75%, Cyflwyniad 25%.

Astudiaethau Beirniadol / Curadurol mewn Cyd-destun 3 (20 credyd, gorfodol)

Adeiladu ar y cysylltiadau rhwng ymchwil ac ymarfer a sefydlwyd ar lefel 5. Nod y modiwl hwn yw datblygu ac atgyfnerthu gallu myfyrwyr i ymgymryd â phrosiect ymchwil mawr sy'n gysylltiedig â'u gwaith stiwdio eu hunain. Bydd yn galluogi myfyrwyr i gynhyrchu gwaith ymchwil estynedig ar bwnc o'u dewis y cytunwyd arno (addas i ymchwil beirniadol a chyd-destunol) sy'n berthnasol i waith celfyddyd gain cyfoes. Bydd y modiwl hefyd yn eu galluogi i greu corff o waith sy'n cyfuno eu gwerthusiad beirniadol a'u dealltwriaeth ddamcaniaethol a pherthynas y rhain â gwaith stiwdio. Traethawd Hir 90%, Cynnig traethawd hir 10%.

Astudiaeth Annibynnol 2 - Arddangos (40 credyd, gorfodol)

Prif bwyslais y modiwl terfynol hwn yw'r sioe radd. Mae hefyd yn dynodi newid i fywyd y tu hwnt i'r brifysgol, y mae'r rhaglen wedi bod yn paratoi ar ei gyfer ar ei hyd. Bydd yr arddangosfa gradd yn ystyried dulliau o gyflwyno gwaith, hunanwerthusiad beirniadol, profiad proffesiynol o weithio gydag oriel allanol a datblygu sgiliau cyfathrebu a threfniadaethol unigol a grŵp. Mae'r blog yn parhau yn bwysig drwy gydol y gwaith hwn a byddwch yn derbyn adborth llafar ac ysgrifenedig penodol ar eich ymarfer stiwdio ac yn datblygu ymwybyddiaeth feirniadol yn ystod y modiwl. Dylai hyn adlewyrchu ymrwymiad beirniadol cryf gyda dilyniant wythnos wrth wythnos y cwrs. Portffolio 100%.