Cymorth Myfyriwr
Rydym yma i'ch helpu.
Gwasanaethau i Ddysgwyr
Yng Ngrŵp Llandrillo Menai, rydym ni'n cynnig ystod eang o wybodaeth a gwasanaethau cefnogi i'ch helpu i wneud y dewisiadau cywir cyn i chi gyrraedd y coleg, a thra byddwch chi yma. Pa gampws bynnag y byddwch chi'n ei fynychu, bydd y tîm Gwasanaethau i Ddysgwyr yn siop un stop i chi gael cyngor ac arweiniad ar bob math o bynciau:
Cefnogaeth Bersonol:
- Cyngor pwrpasol ar sut i fynd ati i lunio cynllun dysgu i chi eich hun
- Arweiniad ynghylch gwneud cais am gyrsiau a gofynion mynediad
- Gwybodaeth am ffioedd cyrsiau
- Help i wneud cais am fenthyciadau a grantiau i ddysgwyr
Mae'r gwasanaethau ychwanegol sydd ar gael yn cynnwys:
- Cyfleoedd i hyfforddi a datblygu gyrfa
- Cyngor ar yrfaoedd a lleoliadau gwaith
- Cyngor ar Addysg Uwch
- Cefnogaeth iechyd a lles
Tyrd am Sgwrs cyn Gadael Cwrs
Bydd cynghorwyr cyfeillgar ein Gwasanaeth i Ddysgwyr ar gael i gynnig cyngor diduedd i'ch helpu i wneud penderfyniadau doeth. Os ydych chi'n ystyried newid eich cwrs neu adael y coleg, a wnewch chi lenwi'r Google Form erbyn 27 Medi neu siarad â'ch tiwtor personol. Bydd rhywun o'r Gwasanaethau i Ddysgwyr yn cysylltu â chi'n fuan.
Mae'r Google Form ar gael ar eDrac y Dysgwyr neu gallwch fynd i'r adran Gwasanaethau i Ddysgwyr ar eich campws.
Cymorth Dysgu
Os ydych chi'n cael trafferth gyda'ch astudiaethau, peidiwch â phoeni. Mae ein gwasanaethau Cymorth Dysgu ar gael i'ch helpu chi i lwyddo. Rydym ni'n cynnig sesiynau un i un a sesiynau grŵp i ddysgwyr sydd angen cefnogaeth dros gyfnod byr neu gefnogaeth dros gyfnod mwy hir dymor. Gall ein tîm Cymorth Dysgu helpu drwy gynnig offer arbenigol, cynnal asesiadau ar gyfer anawsterau penodol fel dyslecsia, a thrwy wneud trefniadau arholi arbennig ar eich cyfer.
Cyfleusterau a Chymorth i Ddysgwyr ag Anableddau
Rydym ni'n credu mewn cynnig cyfle cyfartal i bob dysgwr. Mae pob campws yn cynnig cefnogaeth bwrpasol i'r rhai â nam ar eu golwg neu glyw, neu'r rhai sydd angen cymorth i symud. I gael rhagor o fanylion, cysylltwch â'r tîm Cymorth Dysgu ar eich campws.
Cymorth gyda Llythrennedd a Rhifedd
Mae darllen, ysgrifennu, mathemateg a TGCh yn sgiliau bywyd hanfodol. Rydym ni'n cynnig cefnogaeth i'ch helpu chi i wella eich sgiliau ysgrifennu aseiniadau, eich technegau adolygu, a'ch graddau TGAU.
Cymorth Personol a Chymorth Lles
Tiwtoriaid Personol:
Bydd eich Tiwtor Personol yn eich helpu i ymgynefino â bywyd yn y coleg. Bydd hefyd yn eich cefnogi i oresgyn unrhyw heriau academaidd gan eich helpu i olrhain eich cynnydd a gwneud yn siŵr eich bod yn cyrraedd eich targedau.
Cadw'n Ddiogel:
Os teimlwch eich bod yn cael eich trin yn annheg neu fod rhywun yn aflonyddu arnoch, mae cefnogaeth a chyngor ar gael gan dîm y Gwasanaethau i Ddysgwyr.
Cymorth a Chwnsela Cyfrinachol:
Mae staff profiadol ar gael i'ch cefnogi drwy unrhyw heriau personol ac emosiynol neu anawsterau'n gysylltiedig â lles. Os bydd arnoch angen siarad â rhywun, dewch draw i'r adran Gwasanaethau i Ddysgwyr a gofynnwch am gael siarad â Chynghorydd Myfyrwyr neu Gydlynydd Lles.
Profiad o fod mewn Gofal
Os oes gennych chi brofiad o fod mewn gofal (e.e. Plentyn sy'n Derbyn Gofal/Person Ifanc sy'n Gadael Gofal), rydym ni'n cynnig cefnogaeth bwrpasol i'ch helpu i ymgyfarwyddo â bywyd yn y coleg. Mae'r gefnogaeth yn cynnwys:
- Unigolyn cyswllt personol i'ch cynorthwyo drwy'r cyfnod pontio ac i fod yn gyswllt rhyngoch chi, eich tîm addysgu, ac unrhyw asiantaethau cymorth.
- Cymorth ariannol i'ch helpu gyda chostau offer hanfodol
- Cefnogaeth ychwanegol i gynorthwyo gyda chostau graddio i ddysgwyr sydd â phrofiad o fod mewn gofal
Gallwch nodi eich profiad o fod mewn gofal ar y ffurflen gais neu drwy gysylltu â ni ar staysafe@gllm.ac.uk.
Llais y Dysgwyr
Fel myfyriwr, cewch gyfle i ddweud eich dweud ynghylch beth sy'n digwydd yn y coleg. Rydym ni'n croesawu eich sylwadau ac yn gwneud yn siŵr eich bod yn gwybod sut i rannu eich barn â ni. Rydym ni'n gwrando arnoch chi, ac yn gweithredu ar yr hyn y byddwch chi'n ei ddweud er mwyn gwella eich profiadau yma.