Prentisiaethau mewn Canolfan Gyswllt

Mae'r prentisiaethau Canolfannau Cyswllt yn cynnwys cymwysterau cyfredol a hyblyg y gweithir tuag atynt dan arweiniad cyflogwr. Maent yn ateb galw'r cyflogwyr hyn am weithwyr sydd â gwell sgiliau, gan gynnwys sgiliau meddalach fel cyfathrebu, gweithio mewn tîm, sgiliau rhyngbersonol a'r gallu i wella'ch dysgu a'ch perfformiad eich hun.

Pa bynnag ganolfan gyswllt y bydd prentis yn gweithio ynddi, bydd yn dysgu ac yn dod i ddeall y cysyniadau allweddol sy'n gysylltiedig â gweithrediadau canolfan gyswllt, gwasanaeth i gwsmeriaid a sut mae defnyddio'r wybodaeth a'r sgiliau hyn yn y gweithle.

Yn achos prentis Lefel 2, gallai'r sgiliau hyn gynnwys sgiliau technegol i roi ar waith y dechnoleg cyfathrebu, y wybodaeth a'r sgiliau sy'n angenrheidiol i ddefnyddio meddalwedd, cyfathrebu â chwsmeriaid, meithrin cysylltiadau â chwsmeriaid a chydweithwyr, datrys problemau, hyrwyddo cynnyrch a/neu wasanaethau, gwerthu pethau, defnyddio sianelau cyfathrebu priodol, cadw cofnodion, casglu adborth gan gwsmeriaid a gweithio mewn tîm.

Yn achos prentis Lefel 3, gallai'r sgiliau hyn gynnwys sgiliau technegol uwch i roi ar waith y dechnoleg cyfathrebu, y wybodaeth a'r sgiliau uwch sy'n angenrheidiol i ddefnyddio meddalwedd, datrys problemau, gwella bodlonrwydd cwsmeriaid, arwain tîm, gwella teyrngarwch cwsmeriaid, casglu a dadansoddi adborth gan gwsmeriaid, ymdrin â chwynion a chynnal gwasanaeth dibynadwy i gwsmeriaid.